Ondarroako Udala - Albisteak - Ondarroako Udala

Ondarroak hainbat ekitaldi antolatu ditu Martxoaren 8an Emakumeen Nazioarteko Eguna dela eta

asier — 2010-03-03T12:18:15Z

Emakumeen Nazioarteko Eguna dela eta, Ondarroako Udalak egitarau zabala prestatu du Martxoaren 8aren inguruan. Hasteko martxoaren 5etik 14ra bitartean 'Emakume kubatarrak, iraultza bat beste baten aurrean' izeneko erakusketa egongo da ikusgai, Udal erakusketa aretoan. Egunero egongo da zabalik, 18:30etik 20:30era, aste bitartean, eta 12:00etatik 14:00etara larunbat eta igandeetan.

Bestelako ekitaldiak martxoaren 6an hasiko dira. Horrela, gaueko 21.00etan luntxa eta dantzaldia egingo dira Antiguako Aman. Bi egun beranduago, martxoaren 8an, Emakumeen Nazioarteko Egunean bertan, ohiko kontzentrazioa egingo da Alamedan. Ekitaldia 13.30ean hasiko da eta 'Gora emakumeon borroka' lelopean.

Martxoaren 10ean 'Munduko emakumeekin elkartasunean eta elkartrukean' izeneko mahai ingurua izango da Kofradia zaharrean. Arratsaldeko 17.00etatik aurrera, 'Hemengo eta hango emakumeak', 'Munduko emakumeak' eta 'Emakumeak aniztasunean' emakume elkarteek hartuko dute parte; Jabekuntza Eskolako elkartasun taldearekin batera antolatzen den ekitaldi honetan.

Martxoaren 12an 'King-Kong Neska' izeneko antzezlana ikusteko aukera izango da Kofradia Zaharrean, arratsaldeko 20.30etik aurrera. Lana Virginie Despentes-en Teoría king kong makarraren hitzaurrean oinarrituta dago, bakarrizketa bihurtua, eta Josune Cantaclarak antzeztuko du. Sarrerak salgai Turismo Bulegoan egongo dira salgai bi euroren truke.

Azkenik, gogoratu behar da Ondarroako Emakumeentzako Jabekuntza Eskolak bere ikastaroekin jarraitzen duela eta, hilabete honetan, 'Feminismoaren aztarnak Ondarroako emakumeengan' izenekoaren txanda dela. Hauxe martxoaren 26 eta 27an egingo da; barikuan, 17:00etatik 20:00etara; eta zapatuan, 10.00etatik 13.00etara. Ezinbestekoa da aldez aurretik izena ematea Udal berdintasun Sailean, edo 94 683 36 70 telefonora deituz, edo emakume@ondarroakoudala.net helbidera mezu bat bidaliz.

Eva Eizagirrek egindako lana aukeratu dute Martxoaren 8ko kartela iragartzeko lehiaketan

eneko — 2010-02-16T16:07:32Z

Beste saria, 16 urtetik beherakoentzakoa, Zaldupe ikastolako lehen hezkuntzako 3. Maila B-ko neska-mutilez osatutako talde batek irabazi du

Eva Eizagirre Alkortak egindako lana aukeratu dute Martxoaren 8a, Emakumeen Nazioarteko Eguna, iragartzeko kartel lehiaketako irabazle moduan. Eizagirreren lana lehiaketa nagusian gailendu da “Urdiñetik arrosara morearen bitartez!” izeneko lan koloretsuarekin, eta horregatik 1.000 euroko saria jaso du.

Bestalde Aiert Olabarria, Aitor González, Ainhoa Maruri, Markel Martínez, Amaia Iriondo eta Jon Muñoz-ek osatutako taldeak egindako lana 16 urtetik beherako lehen sailkatu bezala hautatu dute, “Neska” lanarengatik. Zaldupe ikastolako lehen hezkuntzako 3. Maila Bko ikasleek 200 euroko poltsikoratu dituzte.

Ondarroako Emakumeentzako Jabekuntza Eskolak otsailetik ekainera arteko egitaraua aurkeztu du

asier — 2010-02-04T13:01:27Z

Ondarroako Emakumeentzako Jabekuntza eskolak otsailetik ekainerako egitarau berria aurkeztu du. Eskola honen helburua emakumeen partaidetza soziala eta politikoa bultzatzea da, eta horretarako, sare-lanean gauzatzen da proiektua. Aurten, gainera, sarea indartzeko erronkari heldu zaio ikasleen arteko harremanak eta elkartrukea sustatzen ahalegintzeko. Ikasturtean zehar ikastaroak eta ikasturte amaierako ekitaldiaz gain, jardunaldi bat antolatuko da oroimen historikoa eta feminismoaren gainean jarduteko (otsailak 6). Ekainaren 12an ikasturte amaierako topaketa bat egingo da lau eskolen artean.

Talde bakoitzeko, gutxienez, zazpi lagunek eman behar dute izena, eta ikastaro bakoitzeko lagun-kopurua bete ahala itxi egingo da matrikulazioa; bestela, ikastaroa hasi arte egongo da zabalik. Egutegi osoa PDF honetan.

Izena emateko matrikula-fitxa bete behar da eta ordainketa Udal Diru-Bilketa bulegoan egin (Kantoipe, 3an) edo BBK-ko hurrengo kontu zenbakira diru-sarrera eginda: 2095 0058 12 3830434777. Ordainagirian izena, bi abizen eta "eskola" hitza agertu behar dira. Matrikulazioa ez da onartuko matrikula-fitxa bete eta ikastaroa ordaindu arte. Dirua ordaindutakoan, baxarik izanez gero, ez da dirurik itzuliko.

Programazioa lau ildotan dago banatuta. Alde batetik Nortasunaren ildoan Emakumeak eta Subjetibotasuna atalean 'Jabekuntzaren bidean lariuan-lariuan' eta 'Zertaz ari gara Maitasunaz ari garenean? landuko dira; Munduko Emakumeak Elkartasunean eta Elkartrukean ildoan, 'Munduko emakumeen literatura: Karibe eta Afroamerika'; eta Feminismoaren ildoan 'Genero indarkeria errazten duten egitura-faktoreak', 'Feminismoaren aztarnak Ondarroako emakumeengan' eta 'Kolonialismo ondorengo feminismoa eztabaidan'. Azkenik, formazio ildo berri bat landuko da: emakumeen osasuna, hain zuzen. Honen barruan "Zoru pelbikoa indartzea" ikastaroa.

Zubi Barria itxita egongo da apirilaren 26ra bitartean

udaletxea — 2010-02-02T16:34:02Z

Apirilaren 26ra bitartean Ondarroako Zubi Barria itxita egongo da, bertan zenbait azpiegitura lur azpitik sartzeko lanak egiteko.

Hain zuzen ere, gas, ur eta argindar azpiegiturak jarriko dira eta etorkizunean beste instalazio batzuk sartu ahal izateko pasabidea egokituko da, telefonoarena esate baterako. Bitartean, beraz, alde zaharrera joateko sarbidea Zaldupe zubitik egin beharko da, eta irteteko Nasa eta Kantoipe kaleetatik.

Iratxe Esnaolak irabazi du Zubikarai nobela saria

asier — 2010-01-29T11:19:20Z

Iratxe Esnaola Aldanondo donostiarrak irabazi du Ondarroako Udalak eta Elkar argitaletxeak antolatzen duten Augustin Zubikarai nobela laburren lehiaketa "Galerna" deritzan lanari esker. Berak jasoko ditu sariaren 5.400 euroak eta udaberrian kaleratuko du eleberria Elkar argitaletxeak. Hala erabaki zuten joan den ostiralean epaimahaia osatzen zuten hiru idazleek: Miren Agur Meabe, Ana Urkiza eta Xabier Mendiguren Elizegik.

Galerna: abuztuko azken eguna da itsasertzeko hiri turistiko batean; beroa jasanezina da, eta galerna datorrela antzematen da. Giro sargori horretan lau pertsonaia, beren arteko harreman sare nahasietan korapilaturik. Erritmoaren erabilera bikainez eta tentsioari une oro eutsiz, sentimenduen biluzte-ariketa trebea egiten du egileak, erromantizismoaren antipodetan, pertsonaiekiko distantzia nabarmen uzten duen idazkera hotz eta zorrotz baten bidez.

Iratxe Esnaola Donostian jaio zen 1983an. Kazetaritzan lizentziatua da EHUn, eta Literaturaren Teorian eta Literatura Konparatuan Granada Unibertsitatean. Gaur egun unibertsitateko irakaslea da Txileko Santiagon. Hauxe izango du argitaratuko duen lehen lana.

Idazlearekin hitz egiteko (aste honetan soilik): 943462272

Sariaren historia

2001    Alberto Ladron Arana (Xake Mate)
2002    hutsik
2003    Fernando Morillo (Gloria Mundi) eta Iñaki Irasizabal (Burua txoriz beterik) (ex-aequo)
2004    Julen Peñagarikano (Apologia)
2005    Irati Jimenez (Bat, bi, Manchester)
2006    hutsik
2007    Jose Inazio Basterretxea (Mandatariaren gerra)
2008    hutsik

‘Begirada feministaren eta begirada literarioaren bidegurutzean’ ikastaroa antolatu du Jabekuntza Eskolak

udaletxea — 2010-01-27T12:29:29Z

Ondarroako Emakumeentzako Jabekuntza Eskolak ‘Begirada feministaren eta begirada literarioaren bidegurutzean’ izeneko ikastaroa egingo du. Iratxe Retolazak zuzenduko duen ekimena urtarrilaren 29an eta 30ean emango da Udal Hitzaldi aretoan. Ordutegia 17:00etatik 21:00etara izango da ostiralean, eta 10.00etatik 14.00etara eta 15.00etatik 19.00etara, larunbatetan.

Matrikulazioa ikastaroa hasi arte egin daiteke, baldin eta arinago gehienezko lagun-kopurua betetzen ez bada, orduan itxi egingo delako matrikulazioa. Horretarako matrikula-fitxa bete eta bost euro ordaindu behar dira Udal Diru-Bilketa bulegoan (Kantoipe 3an) edo hurrengo kontu zenbakira diru-sarrera eginda: 2095 0058 12 3830434777. Ordainagirian hauek agertu behar dira: izena, bi abizen eta “eskola” hitza. Matrikulazioa ez da onartuko matrikula-fitxa bete eta ikastaroa ordaindu arte. Eta matrikula egindakoan, berriz, baja emanez gero ez da dirurik itzuliko. Oinarrizko errenta jasotzen dutenek, ostera, %50eko deskontua izango dute. Talde bakoitzeko gutxienez zazpi lagun egon behar dira.

Ikastaro honek begirada feministaren eta begirada literarioaren arteko bidegurutzean sorturiko ezagutza-bideez eta esperientzia-bideez jabetzea du helburu. Teoria Feministak eta jardun feministak munduari, jendarteari eta testuei erreparatzeko begirada feministaren norabideak zedarritu dituzte; halaber, Literatur Teoriak eta jardun literarioak literatura sorkuntzari erreparatzeko begirada literarioaren norabideak zedarritu dituzte. Sarritan banatu eta urrundu egin diren bi begirada horiek elkartuko dira ikastaro honetan, eta begirada feminista literarioa garatzeko norabideetan jarriko dugu ahalegina. Hortaz, literaturak berezko dituen ezagutzarako bideak eta esperientziarako bideak begirada feminista mamitzeko eta garatzeko baliatuko dira ikastaro honetan

Ondarroako Udalak foru errepideetako 300 metroko zatia lagatzea eskatu dio Bizkaiko Aldundiari

eneko — 2010-01-26T12:46:22Z

Ondarroako Udal Kudeaketa Batzordeak 300 metro inguru osatzen duten bi errepideren lagapena eskatu dio Bizkaiko Foru Aldundiari. Eskari honen helburua leku horretan segurtasuna hobetzea da, behin bere jabegoa lortuta horretara bideratuta egongo diren obra batzuk egin ostean.

Gaur bertan egin den Ondarroako Udaleko Osoko Bilkurak 300 metroko errepide zatia lagatzea eskatzea onartu du, nahiz eta zati hori BI 638 eta BI 633 errepideak hartzen dituen. Honenbestez, titulartasun aldaketa 240 metroko zati bati eragingo dio alde batetik; Txori Erreka kalean, Zubi Barri aurreko biribilgunetik eta laster Aldundiak egingo duen portuko bidearen aurreko biribilguneraino. Bigarren zatiak 45 metro ditu eta Zaldubide kalean dago, Zubi Barriko biribilgunetik hasita Ertzainetxera bidean.

Jabego aldaketa honen arrazoia oinezkoentzako gaineko pasabideak eraiki ahal izatea da. Hirigunea izatean, hauekin Berriatua eta batez ere Mutrikutik datozen ibilgailuen abiadura gutxitu nahi da. Honez gain, laster Zubi Barriaren inguruan egingo diren etxebizitza bloke berriak direla eta han biziko diren herritarrentzat behar den moduko sarbidea eman behar zaie etxeak eta herriko erdigunea lotzeko eta, horregatik, gaineko pasabide horietako bat han eraikiko da. Gainera, errepide hauek udal jabegokoak izatera pasatzen direnean errazagoa gertatuko zaio Udalari hauen azpitik azpiegituren obrak egitea; gasa, ura edo telefonoa, esate baterako.

Ondarroan 2010eko martxoaren 8a iragartzeko kartel lehiaketa

udaletxea — 2010-02-09T08:13:54Z

Ondarroako Emakumeen Udal Berdintasun Kontseiluak martxoaren 8an “Emakumeen Nazioarteko Eguna” ospatuko du eta, urtero legez, bera iragartzeko kartel lehiaketa antolatu du. Lanak 2010eko otsailaren 15erako entregatu behar dira.

Lehiaketa honen helburua emakumeen eta gizonen berdintasuna adierazten duen diseinu grafiko bat aukeratzea da, beraz diseinu grafiko horrek berdintasunaren irudi hori islatu beharko du, edota emakumeen partaidetza bizitza esparru guztietan, edota feminismoa,... eta abar. Kartelek derrigorrez testu hau izan beharko dute: “Martxoak 8- Emakumeen Nazioarteko Eguna - Ondarroa 2010”.

Egile bakoitzak lan bi aurkeztu ahal izango ditu gehienez, eta edozelan ere, sari bakarra jaso ahal izango du. Edozein teknika erabili daiteke, eta A3 neurria (29,7 x 42,2 zm.) edo proportzionala izan behar du. Euskarri gogorrean aurkeztu behar da eta derrigorrezkoa izango da formatu digitalean ere aurkeztea, ikastetxeek derrigorrezko hezkuntzaren eremuan aurkeztutako lanetarako izan ezik.

Bi sari banatuko dira: 1. saria, 1.000€; eta 16 urtetik beherakoentzat , 200€. Azken honetan parte hartzen dutenek gutun-azalean adieraziko dute: “16 urtetik beherakoen saria”.

Ondarroako Udal Erregistroaren ordutegia 9:00etatik 14:00etara bitartekoa da.

ONDARROAN 2010EKO MARTXOAREN 8a IRAGARTZEKO

X. KARTEL LEHIAKETA

Ondarroako Emakumeen Udal Berdintasun Kontseiluak urtero, martxoak 8 “Emakumeen Nazioarteko Eguna”, ospatzen du: emakumeen eskubideak aldarrikatzeko eta berdintasun errealaren alde lan egiten duelako.

Lehiaketa honen helburua emakumeen eta gizonen berdintasuna adierazten duen diseinu grafiko bat aukeratzea da, beraz diseinu grafiko horrek berdintasunaren irudi hori isladatu beharko du edota emakumeen partaidetza bizitza esparru guztietan, edota feminismoa, ....eta abar; hau da, aurkeztuko den diseinu grafikoak ideia honekin zerikusia izan beharko du.

Horrela bada, ondoko oinarri edo baldintzak prestatu dira

1.- PARTEHARTZEA

Edonork parte har dezake, banan banan edo taldeka. Egile bakoitzak lan bi aurkeztu ahal izango ditu gehienez, eta edozelan be, sari bakarra hartu ahal izango du.

Gaia martxoaren 8a da, hau da EMAKUMEEN NAZIOARTEKO EGUNA..

2.- EZAUGARRIAK

Teknika: edozein

Neurria: A3 (29,7 x 42,2 zm.) edo proportzionala

Formatoa: euskarri gogorra.

Derrigorrezkoa da formatu digitalean ere aurkeztea, salbu eta ikastetxeek derrigorrezko hezkuntzaren eremuan aurkeztutako lanetarako[1].

Kartelek derrigorrez testu hau izan beharko dute:

Martxoak 8- Emakumeen Nazioarteko Eguna

Ondarroa 2010

Kartel irabazlean, Ondarroako Emakumeen Udal Berdintasun Kontseiluaren logoa sartuko du Kontseiluak.

3.-SARIAK

Bi sari banatuko dira: 1. saria, 1.000€; eta 16 urtetik beherakoentzat , 200€. Azken hauek gutun-azalean adieraziko dute: “16 urtetik beherakoen saria”.

Oharra: sarien ordainketari dagozkion atxikipenak aplikatuko dira (PFEGZ).

4.- AURKEZPENA

Kartelak 2010eko otsailaren 15ean, 14:00ak baino lehenago aurkeztu beharko dira Ondarroako Udal Erregistroan, bulego orduetan (9:00etatik 14:00etara)..

Kartelek inolako kalterik jaso ez dezaten, behar den bezala estali eta babestuta aurkeztuko dira. Azalean ondoko leloa idatzita eduki beharko dute: 2010/03/08-kartel lehiaketa.

Lanen aurkezpenean ez da egilearen izenik aipatuko. Atzealdean izenordea eta leloa agertzen dutela aurkeztuko dira.

Egilearen datuak (izen-abizenak, helbidea, telefonoa, eta N.A. zbk.) lanarekin batera doan gutunazal itxian emango dira. Gutunazal horren aurrealdean egilearen izenordea adieraziz.

Lanak Ondarroako Udal erregistroan aurkeztuko dira, goizeko 9:00ak eta 14:00ak bitartean.

Lanak aurkezteko epea otsailaren 15ean goizeko 14.00etan bukatuko da. Postaz bidalitakoak ere egun horretara arte onartuko dira eta helbide honetara bidaliko dira: Ondarroako Udala- ERREGISTROA (2010/03/8-Kartel lehiaketa) musika plaza 1, 48700 Ondarroa. 16 urtetik beherakoentzako sarian sartuko direnak, gutun-azalean “16 urtetik beherakoen saria” adieraziko dute.

5.- EPAIMAHAIA

Otsailaren 16an erabakiko da zein kartelek irabazi duen lehiaketa. Emakumeen kontseiluko 2 partaide eta herriko 3 artistak, edo bestela arte grafikoetan adituak osatuko dute epaimahaia. Saririk ez ematea erabaki dezake, bere iritziz, behar den beste kalitaterik ez badago aurkeztu diren karteletan.

6.- JABETZA

Kartel saridunak Udalarenak izango dira eta eskubidea edukiko du iragartzeko, argitaratzeko, zabaltzeko etab. Aurkeztutako kartelekin erakusketa bat antolatzeko eskubidea dauka Ondarroako Udalak. Saritu gabeko kartelak egileen esku egongo dira martxoaren 1ra arte, hortik aurrera, ulertuko da Udalarentzat direla eta honek egokien ikusten duen moduan erabiltzeko eskubidea izango duela.

7-. Lehiaketa honetan parte hartzeak oinarri hauek onartzea suposatzen du.

Ondarroan, 2010eko urtarrilaren 15ean.

[1] Honetaz gain, ikastetxeei talde lanean egitea gomendatzen zaie.

Euskarazko Produktuen Katalogoa

asier — 2009-12-16T11:57:43Z

Euskarazko Produktuen Katalogoa banatzen hasi da Ondarroako Udal Euskara saila herriko familien etxeetara. Katalogo honen helburua da aholkuak ematea eta erraztasunak ematea haurrentzako nahiz gazteentzako gustukoak diren euskarazko produktuak bilatu eta aukeratzeko orduan. Horretarako, musika, informatika, filmak, liburuak, aldizkariak, jostailuak, jokoak eta web-guneak biltzen ditu katalogo honek; aisialdirako produktuak guztiak, eta euskaraz.

Produktu bakoitzeko informazioa jasota dago, hala nola: zein adineko jendearentzat den, gutxi gora-beherako prezioa, egilea eta beste ezaugarri batzuk. Izan ere, gero eta gehiago gara gure aisialdia, ikasketak edo bizitza euskaraz egin nahi dugunak eta euskarazko eskaintzak bilatu eta baliatzen ditugunak. Katalogo hau Euskal Herriko beste hainbat udalekin batera atera da, eta guztira, 240.000 ale zabalduko dira.

Augustin Zubikarai idazlearen biografia aurkeztuko du Udalak

asier — 2009-12-11T12:46:38Z

Augustin ZUBIKARAI. Idazle izatea abertzale izatea zela sinistu eta sentitu zuen. Euskaltzalea zen oroz gain eta euskararen alde lan egitea zen abertzalearen egiteko nagusia. Behin, goi-kargu politiko batek esan zion: “Zuk erakutsi zein dan gure berezitasuna”. Eta Augustinen bizitzaren eta lan oparoaren itsasargia euskara eta euskal ohiturak bildu eta ezagutzera ematea izan zen. Augustin Zubikarai idazlearen biografia kaleratu du Udalak. Herriko idazle baten biografia herriko beste idazle batek egina: Ana Urkiza idazleak prestatu du-eta. Aurkezpena, abenduaren 18an, 20:00etan, Ondarroako Kofradia Zaharra (Erribera 9).

Aspaldiko helburua zen hori, eta orain, argitalpen honi esker, idazlea ezagutu zutenek aukera izango dute haren izaeraren berri zehatzagoa edukitzeko, haren ibilbidearen eta lanaren zertzeladaz harantzago joateko. Baina ezagun zutenek ez ezik gaurko gazteek zein bihar-etziko belaunaldiek ere izango dute idazle handi haren berri.

Ana Urkizak prestatu du liburua Udalaren enkarguz. Izan ere, Ana Urkizak hurre-hurretik ezagutu zuen Augustin Zubikarai idazlea eta pertsona; sarri izan zituen-eta hartu-emanak eta elkarrizketak berarekin, eta bera bezala, gainera, kazetaria eta idazlea da.

Liburuaren edizio berezia da Udalarena, baina Elkar argitaletxeak ere bere "Biografiak" sailean argitaratu du.

Augustin Zubikarairen bizitza eta lana biltzeaz gain XX. mendeko gertaera nagusiak jaso ditu Ana Urkizak liburuan, eta, nola ez, baita ere Euskal Herriaren eta euskararen gerra aurreko sasoia, gerra sasoia eta gerra ondorengoa.

Liburua hedabideen aurrean aurkeztuko da datorren astean; lehenengo Bilbon, Euskaltzaindiaren areto nagusian, abenduaren 14an, goizeko 10:00etan. Bertan egongo dira Udal ordezkariak, Ana Urkiza liburuaren egilea, Andres Urrutia euskaltzainburua eta Miren Josune Ariztondo Kulturako Foru Diputatua. Aste horrretan bertan, barikuan, abenduak 18, Ondarroako Kofradia Zaharrean egingo da aurkezpena, iluntzeko 20:00etan.

Kafe Antzerkiaren XII. edizioa abenduaren 4tik 8ra egingo da

udaletxea — 2009-11-27T19:32:38Z

Hamabigarren edizio honetan, sei saio desberdin egingo dira iraungo duen bost egunetan. Emanaldi hauek Ondarroako Udaleko Kultura Arloak antolatzen ditu antzezlanak hartuko dituzten establezimenduen laguntzarekin: Basati, Maddi eta Mobby Dick tabernak eta Kafe Antzokia.

PROGRAMAZIOA

Abenduak 4, 20:00etan, Maddi tabernan, Jabier Barandiaranen "Pepino ustelak (hozkailuan)" antzezlana.

Abenduak 5, 18:00etan, Kafe Antzokian, Kuko, Truku eta Bolenwaider hirukoteak umeentzako "Taulara" antzezlana.

Abenduak 5, 19:00etan, Basati Pizzerian, Teatro Inciertoren "Mas Eppur si Muove (y sin embargo se mueve)" antzezlana taularatuko dute gaztelaniaz.

Abenduak 6, 20:00etan, Kafe Antzokian, Txalo Produkzioak-en "Ate Joka" antzezlana. Sara Kortazar, Iker Galartza eta Joseba Usobiaga protagonista dituen lana ikusteko 2 euroko sarrera ordaindu behar da.

Abenduak 7, 20:00etan, Mobby Dick tabernan, Txirene Antzerki taldearen "Ogiyik Karri Etzun Semia" antzezlana.

Abenduak 8, 20:00etan, Kafe Antzokian, Ez Dok Hiru Bikoteatroren "Euskarazetamol" antzezlana. Patxo Telleria eta Mikel Martinez protagonista dituen lana ikusteko 2 euroko sarrera ordaindu behar da.

Trafiko aldaketak abenduaren 1etik 15era inguruan

eneko — 2009-12-02T09:39:23Z

Abenduak 1ean hasita eta bi astez, BI-633 (Ondarroako saihesbidea) eta BI-638 (Sabin Arana kalea) Zubi Berriarekin lotzen dituen biribilgunearen lanak direla eta, toki honetan trafikoak aldaketak sumatuko dira eta ezingo da Zubi Berrira ibilgailuz sartu.

Momenturo egin beharreko bidea seinaleztatuko da. Mesedez eskatzen da Lasuen-eko langileek, Udaltzaingoak zein semaforoek ezarritako trafiko antolaketa jarraitzea, ahal den neurrian puntu honetan ematen den trafikoak ondo funtziona dezan.

Azaroak 25: Emakumeek jasaten duten Indarkeriaren kontrako Nazioarteko Eguna

asier — 2009-11-19T12:01:49Z

Datorren azaroaren 25ean izango den Emakumeek jasaten duten Indarkeriaren aurkako Nazioarteko Egunean Ondarroako Udalak bat egingo du Eusko Jaurlaritzako Genero-indarkeriaren Biktimei Laguntzeko Zuzendaritzak, Emakunde-Emakumearen Euskal Erakundeak eta EAEko udalek -Eudelen bitartez eta Berdinsarearen baitan martxan jarri den kanpainarekin.

"Beldurrik Barik" lemapean, gazteei zuzendutako kanpaina bat jarriko dugu martxan, emakume gazteen aurkako indarkeria prebenitzeko. Gazteentzat, gizonen eta emakumeen artean jokabide positiboak eta errespetuan oinarritutakoak sortu eta finkatu nahi ditugulako, bereziki bizitzaren aro erabakigarri horretan, non heldutasunerako bidea hartzen den. EAEko hainbat udalerritako gazteek parte hartu dute kanpainan; izan ere, gazteon mezua jaso nahi genuen, gero, gizarte osoari, eta zehazki, gazte jendeari helarazteko.
Emakumezkoen aurkako indarkeria ez da soilik eraso fisikoetara mugatzen. Indarkeria sinbolikoa ere badago: daturik inon aurkitu ezin bada ere, emakumeengana beldurra eragiten duen hori, emakumeak izate hutsagatik egoera ezberdinak pairatu behar dituztela sinestarazten diena hain zuzen.

Kanpaina hau, Berdinsarearekin batera eta, gazteekin egindako prozesu parte hartzaile baten bitartez sortu da. Horren ondorioz, abesti bat sortu da eta kantuaren bideoklipa ere filmatu da. Honetaz gain, BELDUR BARIK: INDARKERIA SEXISTAREN GIDA, NESKA-MUTILENTZAT! sortu da. Neskek zein mutilek erabiltzeko aproposa den gida honek jokabide sexistak hautematen eta hauei aurre egiten erakusten du. Gida hau herriko ikastetxeetan banatuko eta landuko da. Ekimen hau urte betez abian mantenduko da. Oraingoan, kanpaina ez da 2009ko azaroaren 25ean bukatuko. Indarkeria matxistaren gaiaren inguruan lanean jarraitzeko beharrizana ikustean, ikasturte guzti honetan herriko ikastetxeetan baliabideak eskainiko dira gaia lantzeko; horren artean, aipatutako abestia, bideoklipa eta GIDA.

Kanpainaren ondorioa argia da: gazteak ez dira beldurrez jaiotzen; aitzitik, beldurra izaten erakusten zaie. Guztion ardura da gazteei baliabideak ematea, ahalduntzen laguntzea eta egunez egun "beldurrik barik" bizitzeko aukera ematea, kanpainaren goiburuak dioen moduan.

Puntu lila - Emakumeek jasaten duten indarkeriaren kontra

Iaz ekimen aitzindari eta berritzaile bat jarri zen abian: herritarrek emakumeenganako indarkeria arbuiatzen dutela agerian uzteko, puntu lila bat jarriz etxeko leihoetan, tabernetan, dendetan eta abarretan. Ikur horrekin, jendarte guztiarena den jarrera komun bat agerian jarri nahi dugu, indarkeria sexistaren adierazgarri den jarrera eta jokabide ororen aurka. Horretarako Udalak puntu lilaren kartelak banatuko ditu herritarren artean. Datozen urteetan ere puntu lila hori izango da emakumeenganako indarkeriaren aurkako ikur.

Honetaz gain, herritarrei gonbidapena egin nahi diegu, bereziki herriko neska eta mutil gazteei, azaroaren 25ean, hau da, Emakumeek jasaten duten Indarkeriaren Aurkako Nazioarteko Egunean egingo den KONTZENTRAZIOAN parte hartzeko.

AZAROAK 25. Emakumeek jasaten duten Indarkeriaren Kontrako Nazioarteko Egunean.
13.00etan Alamendan KONTZENTRAZIOA
EMAKUMEEN KONTRAKO INDARKERIA GEHIAGORIK EZ!

UDAL BERDINTASUN SAILA
94 683 3670 Faxa: 94 683 3667 emakume@ondarroakoudala.net
Kanttoipe 3 - 48.700 Ondarroa - Bizkaia

Zaldupe inguruan bidea libre utzi

udaletxea — 2009-11-13T09:57:43Z

Azaroaren 17ko arratsaldetik azaroaren 19ko goizera arte ezin izango da Zaldupeko polikiroldegia eta eskola arteko bidean kotxerik utzi.

Zaldupeko zubiaren alboan joango den pasabidearen lanak direla eta, azaroaren 17ko arratsaldetik (asteartea) azaroaren 19ko goizera arte (osteguna) ezin izango da Zaldupeko polikiroldegia eta eskola arteko bidean kotxerik utzi.

Mesedez eskatzen da udaltzaingoaren aginduak jarraitzea. Horrela oinezkoen pasabidearen muntaketa prozesuak arazorik izatea saihestuko da.

Udal Etxebizitza Tasatuen zozketan parte hartzeko eskaerak azaroaren 24a baino lehen aurkeztu behar dira

udaletxea — 2009-11-11T09:30:09Z

Ondarroako Udalak Lea Artibai osora eta Mutriku eta Debako herrietara zabaldu du Kamiñalde-Iturribarriko Udal Etxebizitza Tasatuen zozketan parte hartzeko aukera.

Hauxe da aurreko deialdietan finkatutako baldintzen artean aldatzen den bakarra, beste guztiak berdin-berdin mantenduko direlarik. Etxebizitzak eta euren garajeak eta trastelekuak babestutako etxebizitza moduan daude izendatuta eta kalifikazio hori izango dute beti. Horren ondorioz, horretarako onartutako udal-ordenantzan zehaztutako gehienezko eskualdaketa-prezioaren eraginpean egongo dira beti. Horrez gain, lehenengo eta behin, udalak eta, bere ordez, autonomia-erkidegoko administrazio orokorrak lehentasunez erosteko eta atzera eskuratzeko eskubideak izango dituzte beti.

Eskabideak azaroaren 24a baino lehen aurkeztu behar dira eta orduan dagozkion agiriak ere aurkeztu behar izango dira, euren artean urteko gutxieneko diru-sarrera haztatuak 9.000 eurotik gora eta 52.500 eurotik beherakoa direla egiaztatzen dutenak. Esleipendunak, gainera, azken 5 urteotan gutxienez 3 urtez Ondarroan edo lehen aipatutako udalerrietan erroldatuta egon behar izango dira.

Hauek dira esleitu beharreko etxebizitzen ezaugarriak:

	Etxebizitza	Metro koadroak	Prezioa
5. lotea	Iturribarri, 12 – 3. ezkerra	79,66	258.059,20 euro
8. lotea	Iturribarri, 14 – 4. eskuma	83,70	270.040,55 euro
13. lotea	Iturribarri, 14 – 1. eskuma	83,70	269.741,01 euro
17. lotea	Iturribarri, 14 – 3. eskuma	83,70	269.803,71 euro
23. lotea	Iturribarri, 16 – 1. eskuma	84,39	272.249,98 euro

Prezioan 22,76 metro koadroko garajea eta 3,60 eta 4,61 metro koadroko trastelekua ere barne.